IME Foundation နှင့် IME International Co., Ltd တို့မှ ပြည်သူ့ကျန်းမာ​ရေးနှင့် ကုသရေးဦးစီးဌာနသို့ Mobile SWAB Van အဖြစ်အသုံးပြုရန် မော်တော်ယာဥ်သုံးစီး ငှားရမ်းခြင်းနှင့်အတူ Mobile Swab Van နောက်ခန်းတည်ဆောက်ခြင်းများအတွက် အလှူငွေ ကျပ်သိန်းခြောက်ဆယ် လှူဒါန်း

144

 

ရန်ကုန်၊ စက်တင်ဘာ ၂၅

IME Foundation နှင့် IME International Co., Ltd. တို့မှ Covid-19 ရောဂါ ကာကွယ် တိုက်ဖျက်ရေးလုပ်ငန်းစဉ်များတွင် အသုံးပြုနိုင်ရန်အတွက် ကျန်းမာရေးနှင့် အားကစားဝန်ကြီးဌာန၊ ရန်ကုန်တိုင်း​ဒေသကြီး ပြည်သူ့ကျန်းမာ​ရေးနှင့် ကုသရေးဦးစီးဌာနသို့ Mobile Swab Van အဖြစ်အသုံးပြုရန် Foton Light Truck သုံးစီးငှားရမ်းခြင်းနှင့် အတူ Mobile Swab Van နောက်ခန်းတည်ဆောက်ခြင်းအတွက် အလှူငွေ ကျပ်သိန်းခြောက်ဆယ်ကို အဆိုပါ ဌာနသို့ We Love Yangon မှတစ်ဆင့် စက်တင်ဘာ ၂၄ ရက်က လှူဒါန်းခဲ့​ကြောင်း သိရသည်။

“Covid-19 ရောဂါ ကာကွယ်နှိမ်နင်းရေးအတွက် တက်တက်ကြွကြွလုပ်ဆောင်ပေးနေတဲ့ We Love Yangon အဖွဲ့အ​နေနဲ့ ပုံသေအထိုင်မဟုတ်ဘဲ လိုတဲ့နေရာတွေမှာ ယာယီသဘောအထိုင်ချပြီး နှာခေါင်းတို့ဖတ်၊ အာခေါင်တို့ဖတ်ယူနိုင်တဲ့ Mobile Swab Van တွေလုပ်ဖို့ ကျွန်တော်တို့တစ်ဦးတည်းကိုယ်စားလှယ်အနေနဲ့တင်သွင်း​နေတဲ့ FOTON အမှတ်တံဆိပ် Light Truck ကားလေးတွေကို ရောဂါကာကွယ်တိုက်ဖျက်မှုတွေလုပ်နေတဲ့ကာလမှာ ပေးသုံးဖို့ ကမ်းလှမ်းလာပါတယ်၊ ကျွန်တော်တို့ဘက်ကလည်း ဝမ်းပန်းတသာပဲ Covid-19 ရောဂါကာကွယ်တိုက်ဖျက်ရေးလုပ်ငန်းတွေပြီးတဲ့အထိ FOTON Light Truck သုံးစီးကို ပေးသုံးပြီး ကုသိုလ်ယူခဲ့ပါတယ်၊ ဒါ့ပြင် အခု Mobile Swab Van ဆိုတာ Covid-19 ရောဂါကာကွယ်ထိန်းချုပ်ရေးမှာ ထိထိရောက်ရောက်ဖြစ်မယ့်အရာလို့ ယူဆတဲ့အတွက် ကျွန်တော်တို့ Group က ဖွဲ့စည်းတည်ထောင်ထားတဲ့ IME Foundation ကိုတင်ပြပြီး အများရဲ့သဘောတူညီချက်နဲ့ Foton Light Truck ကားနောက်မှာဆင်ရမယ့် အခန်းအတွက်ပါ တစ်စီးကိုတပ်ဆင်ခ သိန်း နှစ်ဆယ်နှုန်းနဲ့ ကား သုံးစီးစာ သိန်း ​ခြောက်ဆယ်ကိုပါ ထပ်ဆောင်းလှူဒါန်းဖြစ်ခဲ့ပါတယ်”ဟု IME International Co., Ltd. ၏ Chief Operating Officer ဒေါက်တာညီညီလတ်က ပြောသည်။

IME International အနေဖြင့် ယခု Covid-19 ကပ်ရောဂါဘေးအတွက် လှူဒါန်းခြင်းသည် ကျန်းမာရေးနှင့် အားကစားဝန်ကြီးဌာနသို့ ဒုတိယအကြိမ်မြောက် လှူဒါန်းခြင်းဖြစ်ပြီး ပြီးခဲ့သည့် Covid-19 ပထမလှိုင်းစတင်ခဲ့သည့် အချိန်ကလည်း BAIC Group ၊ Foton Motor တို့နှင့် ပူးပေါင်း၍ ကျန်းမာရေးနှင့် အားကစားဝနိကြီးဌာနသို့ အမေရိကန်ဒေါ်လာ ၄၃,၀၀၀ တန်ဖိုးရှိသည့် Negative Pressure Ambulance ယာဥ်နှစ်စီးကို ဇူလိုင်လအတွင်းက လှူဒါန်းခဲ့ခြင်း ဖြစ်သည်။

မြန်မာနိုင်ငံသည် ယခု Covid-19 ကပ်​ရောဂါ ဒုတိယလှိုင်းတွင် ကူးစက်မှုနှုန်းမြင့်တက်​လျက်ရှိပြီး Covid-19 ကူးစက်ခံရပြီး​နောက် ​သေဆုံးမှုနှုန်းသည်လည်း ဆက်တိုက် ဖြစ်​ပေါ်​နေကာ ကျန်းမာ​ရေးနှင့် အားကစားဝန်ကြီးဌာန၏ စက်တင်ဘာ ၂၄ ရက် ည ၈ နာရီ ထုတ်ပြန်ချက်အရ Covid-19 ​ရောဂါပိုး ကူးစက်ခံရသူ ၈,၃၄၄ ဦးရှိပြီး ​သေဆုံးသူ ဦး​ရေ ၁၅၀ အထိ ရှိ​ပြီဖြစ်သည်။

ကိုဖြိုး

LEAVE A REPLY

Please enter your comment!
Please enter your name here